Semi final hmasa zawk hi April 7, Thawhlehniah Ramhlun South leh Armed Veng South ten an khel ang a, a hnuhnung zawk hi April 8, Nilainiah Armed Veng leh Bethlehem Vengthlang ten an khel ang.
Inrinni khan
Chawhnu dar 1:00-ah Armed Veng South leh Khatla an inkhel a, Armed Veng South hian 4-0 in an khingpui hi an sawp a, tlai dar 3:00-ah Armed Veng chuan 2-0 in ITI an hneh. Zan inkhelah Bethlehem Vengthlang chuan 4-0 in Tuikual S an sawp bawk.
Khatla ngam loh Ruatpuia
Inkhel ṭan tir aṭangin Armed Veng South an hlauhawm nghal a minute ruk na lekah striker Lalruatpuia'n an hma hruaina goal a thun nghal. Armed Veng South lamin inkhel thunun chhunzawm nghal a, minute 24-naah Ruatpuia bawkin an goal hnihna a khung leh, first half-ah goal dang a lut tawh lo a, Khatla-in si hnih an phur.
Second half-ah pawh Armed Veng South bawkin inkhel bul ṭan ṭhain inkhel an thunun leh nghal a, minute 68-ah winger tlanchak Lalmuanpuia'n an goal thumna a khung ve leh a, minute 79-ah Ruatpuia'n he inkhel a goal hnuhnung ber leh hattrick siamna goal a khung leh bawk. Armed Veng South-in harsa lo takin semifinal an in pet tling thei a ni.
Armed Veng an tlo
Inrinni tlai dar 3:00-ah Armed Veng leh ITI an inkhel a, inkhel inhnehtawk takah Armed Vengin 2-0 a ITI hnehin semi final an lut.
Team pahnihin chak ngei an tum a ni tih a tir aṭangin an lan tir nghal. Goal khung tuimin an in nawr nghal a, mahse goal erawh a lut mai lo. Midfield-ah chungnung zawk nih tumin an inbei a, clear chance an nei thei lo ve ve. Goal lut loin chawlhlawk an hmang mai dawna a lan laiin minute 45-ah Zothanzuala chuan box pawn aṭangin mawi tak maiin ITI goal-ah a pet lut. First half-ah Armed Vengin 1-0 in hma an hruai.
Second hlaf-ah ITI lam an beidawng lo a ni tih a lang, an si phurh sut ngei tumin thapui an thawh, mahse goal thun an tum lutuk na lamah an goal an venghin lo thung. Minute 59-naah Vanlalduatsanga'n khelmual dinglam box pawn aṭangin mawi tak maiin Armed Veng goal hnihna a thlawh lut, inkhel tawp thlengin goal dang a lut zui tawh lo.
BVT ral a lian
Zan lam inkhelah Bethlehem Vengthlang chuan team ṭha leh hlauhawm an ni tih lantirin semifinal thleng turin Tuikual 'S' chu 4-0 in an sawp.
Bethlehem Vengthlang tan hian Lalrammawia chuan first half chhungin goal hnih a khung a, chawlhlawk an hman meuh chuan an ke lehlamin semifinal a thleng tawh. Second half-ah pawh an goal hnih neihsa duhtawk mai loin goal khung tumin an nawr leh a PC Vanlalhruaia chuan minite 56 leh 61-ah goal a khung leh a Bethlehem Vengthlang an chungnung hle.
Ruahsur vangin minute 90 khelh theih a ni lo a, amaherawhchu team pahnih inbiakrem hnuah BVT dinhmun a ṭhat tawh avangin chak zawka puan an ni.
Mipuiin tan zir tur
Inrinni inkhelah hian ITI ṭantu ten field chhungah tui bottle an vawm luh bakah ṭawngkam mawi lo tak tak a official te ṭawngkhum avangin second half-ah inkhel tih tawp lailawk a ni. Team tin ṭantute an chak laiin an au thiam a, chak loh hnuah erawh ze ṭha lo zawk an lantir ṭhin. Football hrisel zawk hmu zel turin mipuiin zir tur an nei e.
Source: Vanglaini
0 comments:
Post a Comment