Presbyterian Kohhrana tualchhung kohhran tam zawk chuan zing ni chhuah rualin Isua thawh lehna lawm nan Easter Sunrise Service an hmang a; chawhma, chawhnu leh zanahte inkhawmin, Synod aṭanga thupui thlan sa hmangin Pathian thu an ngaithla a ni. Kohhran tam ber chuan chawhma inkhawm banah thawh lehna lawmna thingpui ruai an ṭheh.
Baptist Kohhran chuan Easter Sunday pualin chawhma leh zanah inkhawm an nei a, chhum/chawhnu erawh chun sunday school atan an hmang. Chawhma inkhawm banah thingpui ruai an kîlho a ni.
Roman Catholic pawhin Easter Sunday hi uar takin an lawm a, parish ṭhenkhat chuan ruai nen an lawm. Nimin chawhmaa inkhawm chu high mass tih a ni a; Pathian chu ênna Pathian a ni tih entir nan nizan dar 6:30 khan biak-ina êng an tithim vek a, biak-in tualah sathau khawnvar kengin kawng zawhin, biak-inah lutin an inkhawm a ni.
UPC North East India leh UPC Mizoram-te pawhin Easter Sunday hi hlim takin an lawm a, an hmunpui aṭanga thupui thlan sa awm loin, tualchhung kohhrante'n an duh ang thupui an thlang a; nimin khan chawhma inkhawm bânah thingpui ruai an kîlho.
Salvation Army chuan zing khawvar rualin hla leh rimawi hmangin Isua thawh lehna thu an puang a; chawhma leh zanah inkhawm an nei a, chawhnuah an zai khawm a ni. Chawhma inkhawm bânah thingpui ruai an ṭheh. Kohhran pawl dangte pawhin Easter Sunday hi hlim takin an lawm bawk a ni.
Pix: Naupangte'n Easter Egg an hlimpui hle
Source: Vanglaini
0 comments:
Post a Comment