Chanmari FC-in an game hmasa berah Kenkre FC 4-1 in an hneh a, nimin zing khan hetiang zat bawk hian Aizawl FC-in Kenkre FC hi an hneh. Tlai inkhelah Chanmari FC-in Delhi club Hindustan FC 6-2 in an sawp ve bawk.
Vawiin hian Mohammedan SC leh Lonestar Kashmir te an inkhel dawn a, tling tura rinkai Mohammedan leh Aizawl FC te hi Inrinni zing dar 9:30 khian Kanchenchunga Stadium-ah an inhmachhawn ang. Chanmari-in Inrinni zing vek hian SSB Ranidanga-ah vawiina PIFA nena inkhel United Sports an hmachhawn ve bawk ang.
Fiahna paltlang Chanmari FC
Chanmari FC coach H. Vanlalthlanga'n match hmasa bera Kenkre an hneh ṭuma starting eleven aṭangin player pahnih chiah a thlak a, Patrick Arol Enondji aiah V. Lalṭanpuia a lut a, right back-ah Lalhriatrenga aiah Lalrosanga a lut bawk.
Starting XI chu
Goalkeeper : Lalawmpuia; Defender : Joseph Lalnunpuia, Lalrinchhana, Lalruatthara, Lalruatthara, Lalrosanga; Midfielder : Malsawmfela, V. Lalṭanpuia, F. Lalrinpuia; Forward : Laldingngheta, Joel Sunday, Lalbiakhlua.Lalrinmuana (C), R. Malsawmtluanga, H. Lalbiakthanga
Forward : Albert Zohmingmawia, Brandon Vanlalremdika, Alfred Kemah Jaryan.
Goal a sur
Chanmari khingpui Hindustan hi I League khel tura rinkai ni lo mah se tawnhriat an neih ṭhat avangin tawh khirh tak tura beisei an ni.
Hindustan-in Chanmari an ngam nghal a, James Effiong hmangin inkhel an ṭan aṭanga rei loteah an khung nghal. Amaherawhchu Chanmari FC player tam zawk hi Santosh Trophy-a Mizoram champion puitu an ni a, Kanchenchunga Stadium hi final round khelhna kha a ni. Chanmari an insiamrem a, si phurh sut tumin an nawr na nghal hle.
Mizoram Police aṭanga loan hmanga an lak luh Lalbiakhlua a ropui a, minute 19-naah goal ṭha tak khungin an siphurh a sut. MPL3 top scorer Biaktea hian a duhtawk mai lo a, minute 10 pawh tling loah goal hnih dang khung belhin hattrick a siam fel der.
Chanmari-in goal venhim an la tum lo, Valpuia penalty hlawhchhuah chu Joel Sunday-a'n an goal lina atan a khung. Chanmari dinhmun a ṭha a, an fimkhur tawk loh avangin Dilli Sanyasi-a'n Hindustan a khung a, first half-ah 4-2 a ni.
Second half-ah Chanmari bawk an khel ṭha zawk a, inkhel an thunun telh telh. Minute 68-naah Dingngheta'n goal nga na a khung a, hun tawp dawnah Joseph-a'n goal rukna a khung leh bawk. Chanmari hi goal tam zawk khung thei dinhmunah an ding a, midfielder Ṭ-a ball petin bar a per a chance ṭha tak tak dang an hlah bawk. 6-2 in inkhel a tawp a, I League second division hmahruaitu chu Chanmari FC an ni.
Chanmari FC coach H. Vanlalthlanga chuan, "Player tin an khel ṭha vek a, Biaktea goal pathum leh goal dang hrim hrim pawh ṭha hlawm tak a ni. Hindustan ṭhat loh vanga goal khung hnem kan ni lo a, kan player-te chet ṭhat vang a ni. Club zawng zawng an ṭha vek a, vawi hnih chak tawh mah ila I League khel tur chuan vanneih a ṭul dawn a ni," tiin a sawi.
Aizawl FC 4 - 1 Kenkre
Aizawl FC coach K. Malsawmkima'n Lonestar Kashmir an hneh ṭuma starting aṭangin player pathum a thlak danglam a, midfield-ah R. Masawmtluanga, H. Lalbiakthanga leh Albert Zohmingmawia te'n a vawi khatna atan bul an ṭan.
Starting XI chu
Goalkeeper : Zothanmawia; Defender : Imanuel HS Lalthazuala, Lalrozama Fanai, Lalramchullova, Emmanuel Chigozie; Midfielder : David Lalrinmuana (C), R. Malsawmtluanga, H. Lalbiakthanga
Forward : Albert Zohmingmawia, Brandon Vanlalremdika, Alfred Kemah Jaryan.
Inkhel chu
Aizawl FC-in bul ṭan fuh tawk lo mah se goal hmaah an hriam a, an attack apiangin an ti goal zel a, minute 10 a tlin meuh chuan goal hnih an khung tawh. Minute 6-na lekah vei lam aṭanga Rozama cross chu Albert-a'n goal-ah chantir nghal a, minute hnih hnuah MS-a freekick chu Nigerian defender Emma-a'n a tauh lut leh bawk. Aizawl FC-in Lonestar an hneh ṭuma bench-a ṭhu Albert leh MS-a te'n khelhna hun ṭha an neih an hmang ṭangkai nghal hle.
Kenkre-in Chanmari FC an khelh ṭum ang bawkin foreigner pakhat chauh an hmang a, Bernard chuan team beiseina siamin first half-ah goal khat a a khung.
Second half-ah team pahnih an inhnehtawk chhunzawm a, minute 75-naah Albert-a thawhrah sengin David-a'n Aizawl FC goal thumna a khung a, hemi hnu hi chuan MPL club an chungnung hle. Minute 80-naah substitute Justice Morgan-a'n hla tak aṭangin kawh zetin a khung a, 4-1 in inkhel a tawp.
Eng nge an sawi?
Aizawl FC coach Malsawmkima chuan, "Ni a sa lutuk a, ka player-te an chau deuh a ni. Kan khel chhe lo a, kan inhnehtawk a, kan danglamna chu keini chuan kan chance neih kan khung kha ni," tiin an chak dan a sawi.
Mala chuan sawi zelin, "Bul kan ṭan ṭha a, match hnih khelha goal riat kan khung thei hi result ṭha tak a ni. Mohammedan kan hmachhawn leh dawn a, an khawng viau chuan ka ring. Amaherawhchu kan zam bik lo. Mizoram mipui ṭawiawmna kan mamawh a, Aizawl FC ni mah ila Mizoram aiawha kal kan ni. Mizo mipui ṭawngṭaipuina kan ngen a ni," tiin a sawi.
Source: Vanglaini
0 comments:
Post a Comment