Inrinni khan I League Second Division khelh chhunzawm a ni a, Aizawl FC-in player pawimawh Liberian forward Alfred Kemah Jaryan tel loin India ram club hlun Mohammedan SC 2-1 in an hneh a; inkhel dangah Chanmari FC-in Kolkata club ṭha United Sporting 5-1 in an sawp bawk. MPL club pahnih chiah hi I League second division vawi thum khelh tawha chak vek thei an ni a, an goal khung belhkhawm goal 25 hi club dang paruk goal khung zat belhkhawm goal 21 aiin a tam zawk.
Chhandamtu Rohminga
Aizawl FC-in Mohammedan SC aṭangin Liberian forward Alfred loan-in an la lut a, Inrinnia club pahnih inhmachhawn ṭumin a khelh ve a rem lo. Alfred tel lohna Aizawl FC an talbuai a, Kolkata club an khel ṭha zawk. MPL3 best player Lalramchullova fimkhur tawk loh vangin Mohammedan forward Daniel Bidemi-a'n ball a chhuh sak a, Shillong Lajong player hlui ball pass ṭha tak chu Ashim Biswas-a'n goal-ah chantirin first half-ah 1-0 a ni.
Second half-ah Aizawl FC an insiamrem a, bench aṭangin tawnhriat nei ṭha Rohminga an luh tir a, Lengpui tlangval hi danglamna thlentu a ni. Minute 70-naah MPL1 best midfielder tauh luh hmangin Aizawl FC-in an siphurh an sut a, hemi hnu minute li hian Rohminga'n penalty a hlawhchhuak leh bawk. Penalty hi Bengaluru FC aṭanga Aizawl FC zawmtu Lalrozama'n a pet goal a, 2-1 in MPL club an chak.
Aizawl FC coach K. Malsawmkima chuan, "Bul kan ṭan fuh thei lo, inkhelh ṭantirh lamah kan talbuai ziah. Second half-ah kan insiamṭha a, goal hnih kan khung thei kha a lawmawm hlein ka hria. Goal hnih kan khung hnuah kan khelh dan pangngaiin kan khel reng a, a tawp lamah tlemin goal venhim lam kan uluk zual. Player inhliam na lutuk kan nei lo a, kan squad a chhah ṭha bawk a, kan hma lam pawh a eng viauin ka hria," tiin an result-a a lungawi thu a sawi.
Goal sur tirtu Chanmari
Match khata goal khung ziah a harsat laiin Chanmari FC chuan match thum khelh tawhah goal li emaw a aia tam emaw an la khung vek. Inrinni khan ground chhe zawk SSB Ranidanga-ah Chanmari an khel a, an thiamna an lantir thei tho.
Chanmari FC tan Mizoram Police aṭanga loan hmanga an lak Lalbiakhlua leh F. Lalrinpuia te'n goal hnih ve ve an khung a, Malsawmfela'n goal khat a khung bawk. Goal nga luh hnuah United SC-in Jagannath hmangin goal khat an khung ve hram.
Chanmari FC coach H. Vanlalthlanga chuan, "Team tin hi an ṭha vek a, chance an neih chuan goal khung an harsat lo. Vawi khat kan tisual a, an goal khung danah khan keeper Lalmama a dem theih loh," tiin an khingpuite chhiat loh thu a sawi. Inrinni khan first keeper Lalawmpuia inhliam vangin a inlan thei lo a, a aiah Chanmari West aṭanga loan-a an hawh Lalruatpuia a lut.
Thlanga chuan sawi chhunzawmin, "Kan game structure hi kan danglamna chu a ni. Player-te'n an tih tur ṭheuh an tih vek a, kan khelh dan hmang player-te'n a hrethiam tial tial a, a lawmawm khawp mai. Tunah chuan Mizoram club-in game awmze nei kan khel ve thei ta a, phai lam club-te pawhin kan khelh dan an chik khawp mai," tiin a sawi.
United SC coach Satyabrata Bhowmick chuan, "Kan khel ṭha lo tih lam sawi ka tum lo. Kan khingpuite'n game ropui tak an lantir a, keini tan chuan a harsa a ni," tiin Chanmari khelh dan a fak.
Source: Vanglaini
0 comments:
Post a Comment