Kan kawr hak a zir hian pian hi a lang danglam thei khawp mai, mahni pian mila inchei thiam te hian fak an hlawh fo. A man tam leh to lam aiin mahni pian leh vun mila inchei thiam a pawimawh fo.
Tun kum 2 kal ta aṭang khan kan nula lam chuan pian lan mawi lehzual nan kawng fêk, mawng lian deuha lan theih dan kawr, peplum kan tih mai chu kan uar hle a, a bikin formal, inneih ni leh inkhawm, tleirawl aṭanga nu upa lam deuh thlengin kan ha sup sup a, kan inhmeh tlangpui bawk. Heng peplum bik phei hi chu kawng a ti lang fêk a, mawnglam tê deuh tan phei chuan pian a siam a, a ṭha phian. Chutah Crop top-in min run leh a, a chhing, kâwng lai tak, kawr tawngchham kan uar leh a, pian nei em em lo, thawl deuh hlei hluai emaw taksa fit thlap tawi fel âtin kan nula ten min run leh a, a cher, a thau, a lian, a tein kan ha chhuak leh ta sup sup a, tlema fashion lama kei ka ni inti tan phei chuan hak loh phal chi a ni lo.
Kan inhmeh leh hmeh loh chu eng pawh ni rawh se, kan incheina erawh kan ning zung zung chu a ni ber a. Uar loh tak tak a awm lo, tunlai tak tak lah a tam, dangdai leh danglam inchuhna generation-ah hian ṭhalai te incheinaah na na na chuan kan zalen ta hle mai. Hmana kan hne deuh kha tun hnaiah kan uar leh a, nimin lawka mi kha vawiinah kan hne leh a. Chung khawvelah chuan `illusion dress’ kan tih mai `curve enhancing dress’ tia kan hriat lar ho hian zawlkhawpui ṭhalaite incheina pawh an rawn tuam leh ta up mai le.
He incheina ṭhat riauna chu a hming put chhan ang reng hian pian a siam a, thau deuh lam tan lan cherna ṭha tak a tling a, dâr leh âwm lian lam tan a hnuai lam fêk awm ang zia ranga cut tawh mai tur. Chutah tak chuan kan designer leh puanṭhui te an pawimawh ta. A themthiam chungnunna hun a ni ringawt. Thawmhnaw cut sawm neuh neuh ngai a nih avang hian puanṭhui thiam satliah tan a har deuh mai thei, amaherawhchu tunlai ṭhalai tam zawkin hak an duh miau avangin kan kut themthiam te tan chona ṭha tak min rawn pe a, a ṭha phian. A chei chhuai chhuai lam a out a, a cut lam erawh a `IN’ chho zel. Mahse a ṭhat leh riauna bawk chu a felfai a, a smart riau bawk, chutih rualin a tunlai phian bawk si. A tlangpuiin rawng chi hnih hman kawp a ni tlangpui, a bikin black & white-ah a lang chiang bik. Chawlhni kawr atan te erawh black & white tlung duh lo tan rawng dang lace te nena chawhpawlh mai tur. Heng illusion dress ṭhatna riau chu i pian mawi lo lai kha a khuhbo hmaks theih dawn a ni. Cher deuh tan thau deuh hleka lan theihna a nih rualin thau deuh tan hlei hlei lan cherna. Inneih leh puipuina te kan uar chho dawn chauh niin a lang.
Kan designer leh puanṭhui thiamte an thiam tawh bawk a, ṭhui harsa tak turah ngai lo ang. I duhthusama an ṭhui tak loh leh readymade-ah lei tur i hmu nual a, chutah Aizawl khawpuiah i duh dan a la awm lo cheu a nih chuan online shopping - zara, mango ho angah te chah theihin an lo chhawpchhuahsak ngei ang che. Pumps te nen hak a him ber, puan i bih dawn a nih pawhin a hill sîn nen i lan tunlai piah lamah a changkang phian ang. Ṭhi mawi dangdai tak fual lutuk lo nen, box clutch nen i accesories duhzawng ber bengbeh emaw ngun, braclet etc nen lo inbel ve leh phawt mai teh, fashion-ah na na na chuan i hnufual miah lo ang.
- Source: vanglaini
0 comments:
Post a Comment