Mizorama kohhran tam ber chuan Good Friday programme hi Ningani zan aṭangin an hmang ṭan a; Presbyterian Kohhran leh Baptist Kohhrante chuan Lalpa zanriah sakramen an chang a ni.
Presbyterian Kohhran chuan nimin khan chawhma, chawhnu leh zanah inkhawm an nei a, Synod aṭanga thupui thlan hmangin thuchah an ngaithla. Baptist Kohhran chuan nimin chawhmaa an hmunpui lam aṭanga thupui thlan an hman bak chu tualchhung kohhrante'n an duh ang thupui an hmang thung.
Roman Catholic Kohhran chuan Ningani zan khan venpui zan an hmang a, puithiamte'n zirtirte ke an sil a; venpui zan a nih angin, zanlai thleng venpuina ṭawngtai hun an hmang. Nimin chhun khan parish tinin khawlaiah 'Kraws kawngzawh' an nei a, biak-inah lutin, inkhawm an nei a ni. Roman Catholic Kohhrante hian Good Friday-ah Isua sûn nan puitling chinin tûkṭhuan an nghei a, an chaw ei ái leh nizana inkhawm thawhlawmte chu mi harsate ṭanpui nan an hmang ang.
UPC kohhran pahnih - North East India leh Mizoram-te pawhin Ningani zan aṭangin Good Friday programme an hmang a, an hmunpui aṭangin thupui thlan a awm lo a, tualchhung kohhrante'n an duh ang thupui an hmang. Tualchhung kohhran ṭhenkhat chuan nimin khan Pathian chawimawi nan ruai an ṭheh a ni. Salvation Army pawhin Ningani zan aṭangin Good Friday programme an hmang a, corp ṭhenkhat chuan nimin tlaiah khan ruai an ṭheha thu dawn a ni.
Source: Vanglaini
0 comments:
Post a Comment