Aizawl, April 4, 2015: April ni 2 Ningani chawhnu lama ruahsura rial tla khan Mizoram hmun thenkhatah in tihchhiat a nei nual.
Nimkin khan Thorang bialtu MLA, Minister ni bawk Pu Zodintluanga chuan a bial chhung khua rialin a denchhiatte tlawhin tanpuina awm thei ang angah hmalakpui nghalin a tawrhpui thu a sawi.
April ni 2, 2015-a thli, ruah leh rial thawkin a nuai Lunglei District chhunga khaw pahnih Dengsur leh South Khawlek te chu vawiin khan bialtu MLA hian a tlawh a, thliin na taka a nuai New Khawlek pawh tlawh nghalin mipui a thlamuan a, sawrkarin tanpui theihna a neih ang angahte hmalakpui nghalin chenna inchung chhiate tan silpaulene pek nghal an ni bawk.
"Ka bial chhung khua Dengsurah hian chenna in 96 a awm a, rial thawk hian in 61 a deng chhia a. Chung zingah chuan mihring chenna in 32 chu nasa takin a chhiaa (severe damage), in 21 chu luah tlak thoa chhia (partial damage) niin, chenna in ni lo 8 a chhe bawk," tiin, "South Khawlek in 30 awmna khuaah hian in riat a chhiain luahtlak a ni lo a, in ding dang zawng zawng deuhthaw a deng chhe tel bawka hnatlanga thawkin Kohhran rangva leh YMA rangva hmangin khawtlang leh khaw thenawm New Khawlek ten an siamtha nghal a ni," Pu Zodintluanga chuan a ti.
Rial thawk hi a na hlea chuti chungin vanneihthlak takin mihring hliam na leh nunna chan an awm lo niin thudawnna chuan a sawi.
Dengsur khua bik hi rial hian a tihchhiat nasat em avangin khawtlang pawh hnatlang mumal thei lovin mahni chenna in theuh an siamthaa silpaulin hmangin an inchung hi an khuh rih hlawm a ni. Rial hi kuttum tiata lian te pawh a tla hlawm niin khaw mipuite hian an sawi a, in pakhat a den phei chu inchung leh ceiling a den tlang hnuah plastic chair a la deng tlang bawk.
Bialtu MLA, Minister ni bawk Pu Zodintluanga chuan tanpuina awm thei ang angah hma la nghal a, Disaster Management & Rehabilitation Dept changtute be pawpin tanpuina an dawn theih turte tifel nghal turin official te a hrilh a ni.
Forest Dept chuan Dengsur khaw mi te tanpuina Rs 2000 pe-in South Khawlek khaw hnatlang tan hian Rs 1000 an pe bawka New Khawlek YMA ten South Khawlek hnatlang te Rs 500 an pe bawk. Lunglei DC Ashish More chuan a district chhung khaw pahniha chhiatna thleng chu pawi a tih thu sawiin BDO kaltlangin tawrhpuina lehkha a thawn nghal bawk a ni.
Serchhip District-a Bungtlang khuaah chuan rial hian In 200 vel a deng chhia a, chung zinga in 70 chu luahzui tlak loh in a chung rangva a deng pawp a ni. Bungtng a rial tla pawh hi a lian hle a, artui tia te pawh a tla niin thu dawn a ni.
Mamit Distrt-a West Bunghmunah in 180 vel leh Zopuiah In 50 vel rialin inchung a deng pawp a. Thenzawl leh a chhehvelah pawh rial a tla nual a, Mizoram khawchhak lam Khawbung leh a chhehvelah a tla nasa hle bawk niin thu dawn a ni.
April ni 2 chhuna ruahsur leh thli thawk khan power line te pawh a tichhe nual a ni.
Pic : PC Lalropuia
Source: Mizo Special Report
0 comments:
Post a Comment