April 4-ah Larsap la lut dawn

Aizawl, April 2, 2015: Mizoram Governor hna chelh lailawk turin West Bengal Governor Keshari Nath Tripathi chu April 4, 2015 tlai dar 4-ah lak luh a ni dawn a; lak luh dan tur sawiho nimin khan chief secretary Lalmalsawma hoin CS conference hall-ah mi pawimawihte an ṭhukhawm.

Sorkar thuchhuah tarlan danin, Keshari Nath Tripathi hian April 4-ah Aizawl a rawn thleng dawn a, Lengpui Airport-ah hmuahna programme hman a nih hnuah, tlai dar 4-ah Raj Bhavan Durbar Hall-ah Mizoram Larsap ni turin rinawmna thu tiamtira lak luh a ni ang.

Keshari Nath Tripath hi kum 1934-ah Allahabad, Uttar Pradesh-ah a piang a, politics-ah nihna pawimawh tak tak a chelh tawh bakah, lehkhabu ṭhahnem tak a ziak tawh a ni.

Source: Vanglaini

Share on Google Plus