Aizawl, April 2, 2015: State Election Commissioner L Tochhong chuan nimin khan a pisaah Mizoram district paruk - Aizawl, Lunglei, Serchhip, Champhai, Kolasib leh Mamit district-a village council leh Aizawl khawpuia local council inthlan hun tur a puang. VC leh LC inthlan hun tura ruat chu April 30, 2015 a ni.
SEC L Tochhong sawi danin, VC leh LC term hi kum thum ni tawh loin, kum nga a ni tawh dawn. District paruka VC leh LC inthlan vote thlak chu April 30 zing dar 7 aṭanga tlai dar 5 thleng neih a ni ang a, vote thlak zawh veleh vote chhiar nghal a ni ang.
Inthlan atan hian SEC chuan April 6-ah hriattirna a chhuah dawn a, April 13 thleng nomination paper thehluh theih a ni ang. Nomination-te chu April 14-ah endik a ni ang a, inhnûkdâwk duh tan April 16 chhun dar 12 thleng hun hawn a ni dawn. Inthlan ṭhat ngai a awm chuan May 1, 2015-ah vote thlak ṭhat tur a ni a, May 7, 2015-ah VC/LC executive body din tawh tur a ni.
State Election Commissioner sawi danin, tun ṭumah hian Assembly electoral roll behchhana roll siam a nih avangin voter an tlem zawk a, kum 2012-a VC inthlanah voter 4,06,003 an awm laiin, kuminah chuan voter 3,96,601 an awm a, kumina an tlem zawkna chu voter 9,402 a ni.
L Tochhong chuan, VC leh LC inthlanah hian hmeichhiate tan seat hauhsak an nih dawn thu leh, seat hauhte chu mipate tan chuh theih a ni dawn lo a, hmeichhia candidate tur an awm loh pawhin a ruak mai dawn tih a sawi a, "VC seat zat chu in awm zat aṭanga siam a ni a, LC-a seat zat erawh chu voter awm zat aṭanga siam a ni," a ti.
VC-ah chuan, in 200 aia tlemah VC member pathum awmin, pakhat chu hmeichhia a ni tur a ni a; In 201-500 awmnaah VC member panga awmin, seat khat chu hmeichhe tana hauh a ni. In 501-1000 inkarah VC member pasarih awmin, seat pahnih chu hmeichhia tan hauh a ni a, in 1,001 aia tam awmnaah VC member pakua awmin, seat thum chu hmeichhe tana hauh a ni. Local council-ah chuan, member panga awmnaah hmeichhe tan seat pakhat hauh a ni a; member pasarih awmnaah hmeichhia tan seat pahnih hauh a ni thung.
Inthlanah hian candidate tinte'n ballot box hranpa ṭheuh nei tawh loin, ballot box pakhat an hmang tawh dawn a; hmeichhe tana seat hauh bika candidate-te thlanna turin ballot paper rawng dang hman a ni ang. SEC chuan, district tinah election observer dah a ni dawn a, observer atan Mizoram sorkara secretary chin chauh ruat an ni dawn tih a sawi.
VC leh LC inthlan hun puan a nih tâk avang hian Model Code of Conduct hman ṭan nghal a ni a; SEC L Tochhong chuan, Model Code of Conduct hian political party te, candidate te, minister te, parliamentary secretary te, MP te, MLA te, AMC councillor te, LC leh VC inthlannaa inhnamhnawih public servant-te a huam tih a sawi.
VC leh LC inthlan hun
| Hriattirna chhuah hun | 6-Apr-15 |
| Nomination file hun hnuhnung | 13-Apr-15 |
| Nomination endik hun | 14-Apr-15 |
| Inhnuhdawh hun tawp | 16-Apr-15 |
| Symbol inpek hun | 16-Apr-15 |
| Inthlan vote thlak | April 30. 7:00 AM - 5:00 PM |
| Vote chhiar hun | April 30 (Vote thlak zawh veleh) |
| Executive body din hun | May 7, 2015 |
VC leh LC inthlanna tur dinhmun
| District | In zat | Voter | VC/LC | - | Seat awm zat | |
| - | - | - | awm zat | General | Women | Total |
| Aizawl | 20,485 | 75,400 | 95 | 282 | 105 | 387 |
| Lunglei | 30,002 | 98,312 | 145 | 425 | 158 | 583 |
| Serchhip | 12,348 | 43,501 | 49 | 159 | 56 | 215 |
| Champhai | 24,146 | 79,415 | 108 | 344 | 124 | 468 |
| Mamit | 18,803 | 49,100 | 87 | 267 | 90 | 357 |
| Kolasib | 16,199 | 50,873 | 52 | 191 | 65 | 256 |
| Sub-Total | 1,21,983 | 3,96,601 | 536 | 1,660 | 598 | 2,266 |
| Local Council | 52,093 | 1,92,382 | 83 | 392 | 143 | 535 |
| G. TOTAL | 1,74,076 | 5,88,983 | 619 | 2,052 | 741 | 2,801 |
Source: Vanglaini
0 comments:
Post a Comment