Inkhel chu
Champion lai Ramhlun South-in inkhel bul an ṭan ṭha a, minute ngana lekah mual veilam sir aṭanga Vanlalthlamuana cross ṭha tak mai chu Lalawmpuia'n a tauh goal teuh hle. Midfield-ah Samson Ramengmawia a khel chhe lo a, inkhel khaikhawmtu ber a ni.
Ramhlun South lam bawkin goal hlauhawm an nei chhunzawm a, mah se striker Zico Zoremsanga'n keeper chauh a hmachhawn hnuah goal zawnah a khung lo.
Minute 28-naah Dinthar hun a thleng a, freekick aṭanga ball lo kal chu vengtu nei lo Sawmtluanga'n a thun chiang hle.
Si phurh sut nghal tumin Ramhlun South lamin thapui an thawh nghal, minute 36-ah Samson-a ball pek ṭha tak mai chu Thlamuana'n mawi takin a khung a, 1-1 a ni. Inkhel boruak a sang chho zel a, minute 40-naah MPL1-a Dinthar FC player Thlamuana chuan Ramhlun South goal hnihna kawh pawtin a khung.
Dinthar lam an awm mai mai bik lo, an nawr let nghal a mah se an vanneih lo, goal ban an tih per a, Ramhlun South an him.
Second half-ah Dinthar lamin bul an ṭan fuh zawk a, ṭan aṭanga minute thum lekah Lalnunmawia'n goal a khung nghal a, 2-2 chiah a ni.
Ramhlun South pawhin Lalnunmawia an nei ve tho a, Dinthar FC player pawimawh Mawitea hian a club khelhna veng lamah a khung. Dinthar an duai lo, Samuel Laltlanthanga'n minute 60-naah an si phurh a sut ve nghal.
Darkar chanve khelh tur a la awm a, 3-3 a ni. Team pahnih ten chak zawk nih an duh ve ve tih an game aṭangin a lang. Minute 73-ah Dinthar midfielder Lawmsangzuala a chesual a, anmahni lamah a ti goal palh. Goal dang a lut tawh dawn lo emaw tih hnuah hun pek belhah Dinthar FC forward Lalawmpuia'n Ramhlun South goal nga na a khung ve leh a, 5-3 in Ramhlun South an chak.
Eng nge an sawi?
Ramhlun south coach HC Zarzoliana chuan, "Kan vannei kan chak hram a ni e. Inkhel hautak leh hahthlak tak a ni a, kan khingpuite kha team ṭha tak an nih bawk avangin a harsa hle. Tihsual kan ngah a, kan insiam ṭhat theih nan inkhel kan enlet a ṭul ang." tiin MPL-a Dinthar FC coach chuan Vanglaini palai a hrilh.
Dinthar coach Lalnuntluanga chuan, "Penalty kha hmu turah kan in ngai, penalty min pe sela chuan inkhel result a danglam ka ring," tiin referee thutlukna a sawisel.
Tluanga chuan sawi chhunzawmin, "First half-ah khan kan tum angin kan kheln thei lo a, mah se second half-ah chuan kan insiam ṭha. Ramhlun South lam khan player tawnhriat ngah an neih kha an chhawr ṭangkai bakah kan vanduai ni a ni," tiin a sawi.
Source: Vanglaini
0 comments:
Post a Comment