Laldenga thih champha puala inkhawm hi Rualchhina'n a kaihruai a, Laldenga nupui Lalbiakdiki leh MNF president Zoramthanga ten thu an sawi. Laldenga sûn nan minute khat chhung ngawi rengin an ding a, Zoramthanga, Lalbiakdiki, MNF elected office bearer te, MNF MLA te, MNF-a frontal president-te leh hruaitu dangte'n pangpar an dah a ni.
Lalbiakdiki chuan, a pasal thih aṭanga kum 24 chhung a thih champha a pianga amah chawimawina leh hriatrengna hun MNF-in an buatsaih ṭhin chu lawmawm a tih thu a sawi a, "A fin leh a ropui bik vang a ni lo a, hnam din chhuahna tura a inpekna vanga chawimawi in ni," a ti.
Zoramthanga chuan, Mizote hnam anga kan dinchhuah a, zalenna sang ber kan neihna tura bul tumtu chu Laldenga a nih thu leh an zah thu a sawi a, "MNF movement avangin Mizoramin tun dinhmun hi kan thleng a, kan hnam movement hi a la tawp lo a, a la kal zel dawn. Kum 20 chhung underground movement a hruai a, kum khat leh a chanve vel chauh a CM hnua min boralsan kha pawi kan ti tak zet a ni," a ti.
MNF dintu Laldenga (L) hi June 11, 1927-ah Pukpui, Lungleiah a piang a, October 22, 1961-ah Tuikhuahtlanga a inah MNF an din a, president hmasa ber a ni. Peace Accord ziah hnua kum, interim period-ah chief minister a ni a, kum 1987 inthlanah MNF sorkarin, CM a ni. July 7, 1990-ah London-ah a thi a, November 14, 1990-ah Aizawlah vui niin, Mizorama state funeral-a vui hmasak ber leh a awmchhun a la ni.
Source: Vanglaini
0 comments:
Post a Comment