Khawthlang ram leh Europe-a Holy Week nasa taka an serh a, sa leh wine-te an insûm mek angin hetah chuan kan ti ve meuh lo a, mahse Duhsaki zarah Hapta Thianghlim thianghlimna kan hriat belh thei dawn a ni.
Thawhṭanni zan khan Duhsaki chuan a music video thar 'Krawsah chuan thisen hlu a awm' tih, Kristian Hla Bu no. 202 a sak chu Rev. Lalramliana Pachuau chuan ama quarters, Mission Veng, Synod Compound-ah a tlangzarh. Tlangzarhnaah hian Prof. RL Thanmawia'n hunserh a hmang. He a music video thar hi Duhsaki music video palina a ni.
'Krawsah chuan thisen a awm' tih hla hi Mizo lengkhawm leh solfa zaia kan sak zin pawl tak a ni a, Duhsaki hian heng sak dan kalhmang pahnih inkar deuh, solfa lam pawl mah zawk, solo takin a sa a, ngaihthlak a nuam leh hle dawn. A hla lo sak tawh kan hria a, Mizo Kristian hla ṭha leh KHB-a mi a sa ṭhin a, a thiam em em. Tuna mi pawh hi a neu lo leh viau ang.
KHB-a mi deuh hlir a sak chungchangah Duhsaki nu leh pa, Lallawmkimi leh Lalramhluna te chuan, "Kristian Hla Bua hlate hi a ṭha a, belhchian a dawl a, a ropui a; hla dnag pawh a ṭha vek nachungin, kan rilruah chuan a lang lian a ni. Amah Duhsaki pawhin hla dang duh tak tak chu a nei tho a, KHB hlate hi a duh a, sa tura kan thlansak pawh hian a hnial loh mai bakah sak nuam a ti hle a ni," an ti. A hla sak tur hi a nu leh pa, pi leh putena an thlansak a ni ber.
Duhsaki nu leh pa chuan, "Kumin chho chu kumdang ai chuan video leh music thar lamah kan kal na lutuk lo mai thei. Board exam hmachhawn tur a ni a, chuvang chuan a zirna lamah a rilru pawh seng lehzual se kan duh a ni," an ti. Duhsaki hi tunah hian Class XII a zir dawn mek a, Govt. Mizo Higher Secondary-ah a kal.
Source: Vanglaini
0 comments:
Post a Comment