Chawhma dar 9:30-ah Aizawl FC-in season liamtaa 4-0 a an sawp tawh Kenkre Sports an hmachhawn dawn a, Chanmari FC-in tlai dar 3:15-ah Delhi club Hindustan FC nen an inkhel thung ang.
Inringtawk Aizawl FC
MPL3 champion Aizawl FC-in an hneh tawh Kenkre Sports hneh loh theih tih an chiang, mah se an zam lo. Aizawl FC technical director Hmingthansanga chuan, "Nikuma kan inkhelh kha chuan foreigner an nei lo a, tunah chuan an nei tawh. Team chhia an ni lo a, an foreigner pahnih an rawn thlen phei chuan an ṭha sawt ang. Chutihrualin kan chak erawh kan ring khawp mai, Mizo mipui ṭawngpuina kan ngen a ni," a ti.
Kenkre Sports hian an match hmasa berah Chanmari FC lakah 1-4 in an tlawm a, Aizawl FC an khelh hunah Chanmari FC hmachhawn lo foreigner pahnih an thlen belh a rinawm a, chu chu Kenkre beiseina siamtu tur a ni.
Aizawl FC coach Malsawmkima chuan, "Chanmari FC nena an inkhelh ṭum kha kan thlir a, Kenkre chu an nem deuh chuan ka hria. Foreigner pahnih an neih belh chuan kan hmuh tawh nen khan an inang kher lo ang," tiin an khingpui tur chungchang a sawi.
National Games-a Mizoram champion puitu coach Mala chuan sawi zelin, "Match khelh tur a tam a, player ngai chuan kan khel lo ang. Foreigner erawh a ngai pahnih bawk kan hmang ang," tiin defender Emmanuel Chigozie leh forward Alfred Kemah Jaryan a rin chhunzawm tur thu a sawi.
Aizawl FC squad a chhah ṭha a, an khelh hmasak ṭumin midfield-ah MPL lama an chhawr rim H. Lalbiakthanga leh Albert Zohmingmawia bakah MPL2 best player R. Malsawmkima te'n starting eleven an chang lo a, tu emaw ber hi chuan bul an ṭan tawh ngei ang.
Chanmari fiah tlai
Thawhṭan tlaiah Hindustan FC leh PIFA Sports te an inkhel a, mak takin ṭha lo zawka ngaih PIFA-in goal hnih an khung hmasa a, Delhi club Hindustan FC-in an siphurh an sut vek a, hnehna erawh an chang ta bik lo.
Hindustan hian Nigerian striker Sola an kawl a, a ni hian Delhi Senior Division-ah goal 17 a khung a, nikum I League second division khan goal li a khung. Player pakua hi Santosh Trophy-a Delhi state team ami an ni a, Mohammedan SC aṭanga an lak James Effiong chu an innghahna tur a ni.
Chanmari FC coach H. Vanlalthlanga chuan, "I League second division-ah hi chuan team zawng zawng an ṭha vek. Aizawl FC khan Lonestar Kashmir kha an sawp a, amaherawhchu inkhelh ṭan tirh lam kha chuan Kashmir kha chak zawk tura ngaih an ni. Chuvangin team tin hi chak loh theihna vek an ni a, Hindustan pawh hi an ṭha a ni," tiin a sawi.
Thlanga chuan team chungchang sawi zuiin, "Starting eleven-ah chuan a ngaia kan luh ka ring a, chutihrualin kan practice-a che ṭha fal an awm chuan a thlak danglam theih bawk. Tun dinhmunah chuan inkhel tur tih chian ngam a la ni lo," a ti.
Chanmari FC-in an game hmasa berah Kenkre an sawp a, foreigner Joel Sunday, F. Lalrinpuia leh Malsawmfela te'n goal an khung a. Mak tak chu MPL2 champion team hian starting eleven-ah tlar hma lama tlan ṭhin player an dah lut tam a, match khatnaah an ti fuh a, match hnihnaah Hindustan club lakah fiahin an awm dawn.
Vawiin Inkhel Tur
9:30 AMKenkre Sports Vs Aizawl FC
3:15 PMHindustan FC Vs Chanmari FC
Naktuk Inkhel Tur
9:30 AMMohammedan SC Vs Lonestar Kashmir
3:15 PMPIFA Sports Vs United Sports Club
Source: Vanglaini
0 comments:
Post a Comment