Aizawl, July 12, 2014: MZP leh MSU-te chuan Mizoram University-in degree course hrang hrang result a tichhuak chu lawmawm an tih thu leh, zirlai exam beitu mi 2,425 zinga 1,522-in hlawhtlinna an chang chu lawmawm an tih thu an tarlang.
MSU leh MZP-te chuan, zirlai graduate tharte chu an kal zelna turah duhsakna hlanin, ram leh hnam tana mi ṭangkai ni turin an chah a; zirlai pass zo lote chu beidawng mai lo a, hlawhtlin tuma nasa lehzuala bei turin an chah bawk.
Zirlai pawl pahnihte chuan, MZU-in Ningania result a tichhuahah tihsual na awm chu pawi an tih thu an tarlang. MSU chuan, semester exam danga pass vek tawh si, 6th semester exam result tihchhuaha fail anga tarlan te, repeater exam-a pass tawh, fail anga tarlan eng emaw zat a awm chu pawi an tih thu an sawi. Zirlai pawlte chuan, result-a tihsualte chu a rang thei ang bera siamṭha turin an ngen a ni.
MSU headquarters, Kolasib tarlan danin, 6th semester result a dik lo nasa zual a, semester danga pass vek tawh, 6th semester exam result-a fail anga tarlan eng emaw zat an awm. Mark hmuh dan aṭanga chhuta rank holder ni ngei tur semester exam danga fail anga an tarlan vanga result nei lo anga tarlan leh pass si, fail anga tarlan eng emaw zat an awm bawk.
Kolasib MSU hian result tihchhuah tawh chu cancel a, a bul aṭangin uluk taka rintlak tura buatsaih leh an phût a ni.
- Source: vanglaini
0 comments:
Post a Comment