Aizawl, July 12, 2014: ZNP Political Affairs Committee nimina ṭhukhawm chuan, November thlaaa Governor term tawp mai tur tlingtlak nana Mizoramin Governor thar Kamla Beniwal kan nei chu vanduaithlak an tih thu leh an duh loh an tarlang a, "Hetiang Governor neih hi kan thinlung takin kan welcome thei lo," an ti.
ZNP chuan, ram danpuiah inziak lo mah se, Governor atana ruattu inthlannaa an tlak chuan mi pangngai chuan an nihna an bànsan mai ṭhin nia sawiin, "Dr Kamla Beniwal hi Central sorkar pawhin Gujarat Governor aṭanga báng tura an ngen tawh, báng duh lo a ni a, a awmna state aṭanga transfer ngai khawp Governor hi hruaitu ropui leh rintlak tak a nih kan ring lêm lo," an ti a; Mizoram Larsap atan kan duh lo tih an tarlang.
ZNP chuan, Mizoram Governor thar chu Gujarat state sorkar nen pawh an thawkho ṭha thei lo a, Rajasthan Revenue minister a nih lai pawhin cheng vaibelchhe tam tak tihchingpennaa inhnamhnawiha puh a lo nih tawh thu an sawi a; Mizoram tana chhenfakawm tur mi hmingṭha leh chak Governor an duh thu an sawi bawk.
- Source: vanglaini
0 comments:
Post a Comment