Aizawl, July 11, 2014: GAD changtu, chief minister Lal Thanhawla chuan, tuna sorkar term kal mekah minister leh parliamentary secretary-te tan official car tur Verna 1.7 VTVT pasarih leh support car tur Bolero car 10 lei tawh a nih thu House a hrilh.
MNF member Lalruatkima zawhna chhangin CM Lal Thanhawla chuan, minister leh parliamentary secretary-te motor kawl ṭha lo neite tan motor thar lei a nih thu a sawi a; Verna car pasarih an lei tawhte chu pakhat Rs. 9,60,000 man a ni a, Bolero car man chu pakhat Rs. 7,96,000 a nih thu a sawi.
Chief minister chuan, VIP motor lei nan Rs. 3,41,50,000 ruahman a nih thu a sawi a; minister leh parliamentary secretary-te tan ṭul leh mamawh ang zelin motor lei a nih tur thu a sawi a, "A ṭul angin kan lei a, kan la lei zel dawn... Pawisa awm lo chung chuan phei kan phal lo ang," a ti.
CM Lal Thanhawla chuan, kum 2007-a sorkar order pakhatah chuan VIP-te leh officer motor kawl thei chin te, kawl theih zatte tihchhuah a nih thu a sawi a, "Tunah hian kan kawl theih zat kan la pha lo nasa a ni," a ti bawk.
Lalruatkima chuan, sorkar motor, Baleno car pakhat MZ-01 C-5891 awmna a zawt a, chief minister-in a chhang thei lo. Lalruatkima chuan, car MZ-01 C-5891 chu a kawl lo turin a kawl nia sawiin, "Officer pension tawhin a kawl a, kum chanve a kawl tawh a, sorkar motor dang pakhat a kawl bawk," a ti.
Lalruatkima chuan, sorkar motor MZ-01 C-5891 kawltu chuan sorkar motor dang a kawl chu MZ-01 B-4732 leh MZ-01 K 3454 nih thu te, driver pawh Lalrinngheta a nih thu leh driver chu sorkarin hlawh a ka pek reng thu a sawi a; kuminah DTO-ah sorkar motor thar 118 registration tih a nih tawh thu a sawi bawk.
Sorkar hnathawk pension tawhin sorkar motor a kawl nia sawi chungchangah hian CM Lal Thanhawla chuan, thil dik lo chu tihdik tur a nih thu a sawi a, "Laksak a nih ang," a ti.
Source: Vanglaini
0 comments:
Post a Comment