Aizawl, July 9, 2014: School Education department chuan Mizorama sikul kai hun sawn hma tumin ruahmanna a siam a, hemi chungchangah hian sikul hrang hranga zirlai nu leh pate ngaihdan a la mek.
Sikul kai hun sawn hma chungchangah hian School Education department chuan June 27, 2014 khan DEO leh SDEO tin hnenah lehkha a pe a; chutah chuan sikul kai hun sawn hma chungchang chu sorkar sikula zirtirtu pawl hrang hrang - Mizoram Primary Teachers Association (MPTA), Middle School Teachers Association (MSTA), Mizoram Secondary School Teachers Association (MISSTA) leh Higher Secondary School Teachers Association (HISSLAM)-te nen an sawiho tawh thu tarlan a ni.
School Education lehkhaah chuan, "Kan tu leh fate zan meng rei lutuk leh zing thawh nachang hre lo hian an career a tichhe pha hiala hriat a ni ta... School timing hi sawn hma ila, bàn hun a hma deuh ang a, chawhnu hun âwlah eizawnna atana ṭangkai tur leh an taksa tan pawha ṭha tur inzir nan hun an hmang thei ṭhin tura ngaih a ni," a ti.
School Education department chuan, sikul tinte chu zirlai nu leh pate kokhawm a, sikul kai hun sawn hma chungchanga an ngaihdante hre turin a chah a; report chu July 11, 2014 ral hmaa School Education director hnena thlen turin a hriattir bawk.
Thu dawn danin, School Education department hian sikul kai hunah duh thlan tur pahnih a siam a; pakhat zawk chu zing dar 7:30-a ṭan a, chawhnu dar 1:30-a bàn a ni a, pakhat dang chu zing dar 8-a ṭan a, chawhnu dar 2:30-a bàn a ni.
School Education director leh secretary R Lalvena chuan Vanglaini palai zawhna chhangin, sikul kai hun sawn hma chu MPTA, MSTA, MISSTA leh HISSLAM-te nen an sawiho a, ṭha an ti tlang tih a sawi a, "Zirlaite leh an nu leh pate khawih thil a nih avangin, barakhaih thut kan duh lo a, an ngaihdan ka la a ni," a ti.
R Lalvena chuan, tuna sikul kai hun kalpui dan chu zirlaite tan a ṭha ber loa ngaih a nih thu sawiin, "Tunlaiah zingah kan tho tlai tlangpui a, zing karah thil tihna hun a awm lo a, tlaiah pawh thil tihna hun a awm chuang lo. Sikul bàn hma a nih chuan tlai lamah thil ṭangkai tam tak tihna hun leh co-curricular activity tihna hun a awm thei dawn a ni," a ti.
School Education secretary chuan, Zirlai nu leh pate ngaihdan chu thehluh kim a nih hunah an zir chiang ang a, kal dan turah thutlukna an la siam dawn thu a sawi a; tun dinhmunah chuan kal dan tur sawi chian theih a nih loh thu leh, sikul kai hun sawn hma chu kalpui ṭan hun tur pawh sawi theih a la nih loh thu a sawi bawk.
Source: Vanglaini
0 comments:
Post a Comment