Aizawl, July 11, 2014: Bill pu luttu, Excise & Narcotics minister R Lalzirliana chuan, "Kan ram hi zuin a tihbuai loh state nih kan duh avangin MLTP Act hmangin tihrem kan tum a, kan hlawhchham a ni. Chu dan chu ennawn a, MLPC Bill, 2014-a thlak kan tumna hi mi ṭhenkhatin zu thlah zalen tumnaah an ngai hi sorkar ngaihdan a ni lo. Kan tihrêm theih loh hi thununna hnuaiah dah kan tum zawk a ni," a ti a; MLPC hman a nih dawn vanga a ṭha lo zawnga ngaihdan lo siam ngawt chu thil dik a nih loh thu a sawi.
MLTP Act hnuaiah zu chhia vangin mi tam takin nunna an chán nia sawiin, R Lalzirliana chuan, "Zu chhia hian hrisel lohna nasa tak thlenin, zu khap hma aiin zu vanga damdawi-ina lut an tam zawk tih hriat a ni. MLTP Act hi hlawhtling ni se chuan kan ram leh khawtlang pawhin a nawm phah dawn tih a chiang reng a, chu chu kan duhthusam pawh a ni," a ti.
Excise Minister sawi danin, MLTP Act chu a tirah hlawhtling viau mah se, thawktu indaih loh vang te, mi mante an tàn rei loh vangte leh jail indaih loh vangtein hun a rei deuh hnuah zu a tam leh hle a; tlawmngai pawlte pawhin doin hma la mah se, excise leh police zu man a pung tual tual a ni.
MLTP Act a awm loh avangin zu zalen taka phalrai a nih dawn loh thu sawiin R Lalzirliana chuan, "A lei thei chin fel taka bithliahin, vantlang hmuna in leh rûite tun hma aia khuahkhirh zawk tum a ni. Zu chhiah ît thu kan sawi ngai lo a, zu chhe in ṭhinte hnenah zu ṭha zawk in tura duhsakna mai a ni. Mi zawng zawng zu inna tur atana dan thar hi buatsaih a ni lo," a ti.
R Lalzirliana chuan, zu zawrh a nih pawhin mi pakhatin duh duh zat an lei theih dawn lo tih sawiin, "Zu leia in ruih a, mi dang tana harsatna a siam chuan dan hmanga man theih a ni. Man tawh phawt chu pawisa eng emaw zat chawi leh lung-in tàn emaw, a pahnih hmanga hrem theih an ni," a ti a; zu vanga harsatna siamte man chungchangah police leh excise bakah, NGO-te an ṭangkai tur thu a sawi.
House-a MLPC Bill chungchang sawihonaah hian ruling member 19 leh opposition member parukin thu an sawi a; ruling member-te'n an thlawp thu an sawi vek laiin, eptu member-te chuan MLTP Act la hman zel a, khauh zawka kenkawh an duh thu an sawi thung. Bill pass-naah eptu member-te chu awm duh loin, House an chhuahsan a ni.
Mizorama zu khap burna dan MLTP Act. 2005 hi February 20, 1997 aṭanga hman ṭan a ni a, kum 17 hman anih hnuah thlak a ni dawn ta a ni.
Source: Vanglaini
0 comments:
Post a Comment