Aizawl, July 9, 2014: Higher & Technical Education department chuan thuchhuah siamin, academic session thar inṭan chhoa Aizawla college admission chungchanga department ṭan lak dante a tarlang a; college principal-te an theih ang tawkin an inpawt fân a, an lak theih zat aia tam fê zirlai an lak tawh thu leh, Aizawl pawn lamah erawh chuan seat a la tam thu an sawi.
H&TE chuan, sorkar harsatna tarlangin, Aizawl khawpuia college-te chu hmun rem lo tak tak an awm a, rualawhna vangin a rem ang anga cheibâwla zirna kalpui an nih hlawm thu an sawi a, "Class room leh building-in a dâwl zawh loh chin a awm a ni," an ti. Aizawlah zirlaite'n admission an inchan loh viau laiin, Aizawl páwn lam college-ah seat 544 a la awm tih an sawi.
H&TE chuan, MZP-in zirlai 409-in Aizawlah admission an la hmu lo nia an sawi a, vawiin July 9 aṭanga H&TE directorate bula lungawi lohna lantir an tum chu ti lo turin an ngen a, "Sorkar tih theih chin (limitation) hrethiam a, zirlaite hmakhua thlir tela lungawi lohna lantir zui lo turin sorkar chuan a ngen tak meuh a ni," an ti.
H&TE chuan hetiang hian thuchhuah a siam a:
1.H&TE Minister hoin MZP leh official-te'n June thla bul lamah meeting neiin an lo thlirho tawh a; principal zawng zawngte chu an theih ang anga lo inpawt fán a, zirlaite beidawnga siam lo tura ngenin, a za têl teh meuh dah belh an ni.
2.H&TE Secretary hoin a chunga mite ho bawk hian June 12-ah meeting nei lehin, hemi aṭang pawh hian mi eng maw zat tan admission ruahman leh a ni.
3.Tukin (July 8) khan H&TE Secretary office-ah MZP hruaitute leh principal-te inràwnkhawmna neih a ni a. Tunah hian Aizawla college pariatah kum 2013 aiin zirlai 858-in admission a pung a ni. Hetih lai hian, zokhaw lama college changtlung tak tak seat an la neih theih dan chu hetiang hi a ni: Art-ah 479, Science-ah 65, a vaiin 544 lai zirlai an la admit thei.
4.Sorkar lam harsatna:
(1) Kan hmuh leh hriat angin, Aizawl khawpui chhunga college-te hi hmun rem lo tak takah rualawhna vangin a rem ang anga cheibawlin zirna an kalpui a, nimahsela, class room leh building-in a dâwl zawh loh chin a awm a ni.
(2) Zirtirtute hi duh ang anga lak theih a nih loh avangin zirlai duh ang ang admit hi thil tih theih a ni lo. Zirlaite beidawng loa admission an hmuh theihna hmun lama a rang lama intifel a, thawveng tak leh tluang taka zirna an chhunzawm hi Mizoram sorkar chuan a duhsak tak meuh a ni.
Source: Vanglaini
0 comments:
Post a Comment