Chief Minister chuan, HPC (D)-te chu sorkarin hmelma angin en duh se chuan ṭingmit vek theih an ni tih sawiin, "Unau anga kan en avangin HPC(D)-te nuai chimit zawngin kan kal lo. Hetianga min tih takah chuan Pathianin a phuba lakna hmanruaah min hmang ngei ang," a ti a; HPC(D)-te chu an duh chhiat em avangin an chungah duh ṭhat bik a rem loh thu a sawi.
HPC(D)-te'n sorkar laipui nena inkahhaina, suspention of operation (SoO) neih mek an bawhchhiat thu sawiin, Lal Thanhawla chuan, "March 28-a thil thleng hi Union Home Minister pawh kan hrilh tawh a, HPC(D) lakah hian beihpui thlak turin kan ti. HPC(D)-te hi an cho chhuah ang ngeiin kan chhâng lêt dawn," a ti.
Chief Minister sawi danin, tunah hian chief secretary Lalmalsawma chu Manipur khawpui Imphal-ah a thang mek a, a thu hawn azirin HPC(D) beih dan turah ruahmanna siam a ni ang.
Mizoram chhunga helho chetna ṭhin chu disturbed area-ah puan a ni lo ang tih a sawi theih loh thu sawiin Lal Thanhawla chuan, "Kan puan chuan an châk lo khawp ang," a ti.
Inkhawm kaihruaitu Home minister R Lalzirliana chuan, HPC(D)-in an kah hlum zinga mi Zoramthara chu an in Khawzawl thleng zuitu tur ruahman a nih loh thu sawiin, "Mitthi chhungte hnenah ngaihdam kan dil tak meuh meuh a, ruang zui turin Minister leh MLA-te ruahman âwm tak a ni," a ti.
Nimina sûnna leh thlahualna hunah hian vanduaina thlenna hmuna kal MLA pathum - RL Pianmawia, Vanlalawmpuii Chawngthu leh Lalthanliana-te pawhin thu an sawi.
RL Pianmawia chuan, amah vanga miin harsatna leh hrehawmna an tâwk nia sawiin, "Zahthlak tihna ka rilruah a lian hle. Mahse, thih vek theihna aṭangin Pathianin min chhanchhuahna kan chang. Kan vanduaina tawh laia kan dinhmunte mitthlaah a la chám reng a ni," a ti.
Lalthanliana chuan nung dama an chhuak chu an vannei hle tih sawiin, "Min thah tum lo ni se, min kap min kap bawk si," a ti a; motor-a an awm lai leh awm loh hnuah pawh HPC(D)-te'n an kah reng thu a sawi.
Sorkar leh party-a a thawhpuite hmuh leh a beisei tawh loh thu sawiin Vanlalawmpuii Chawngthu chuan, "Kan vanduaina tawhnaah hian Mizo tlangvalte huaisenzia a takin ka hmu. Police-te'n an tih tur an ti a, kan hneh ngang lo. Kan tawrhna leh hlauhnate kha chu thuhran ni se, Mizo leh Mizo kan inbei duh hi mak ka ti a, ka rilru tinatu ber a ni," a ti.
Sûnna leh thlahualna hunah hian resolution pass a ni a; HPC(D)-te'n police pathum an that chu vanduai thlak an tih thu te, police-te inpekna leh huaisenna fakawm an tih thu te, hliam tuarte dam leh thuai tura an duhsak thu te, pawi khawihtu a rang thei ang bera zawng chhuak a, an phu tawk hremna pe tura sorkar an phût thute leh, MLA pathumin nunna an chán lo chu Pathianin mipuite tana hna thawk tura hun a la pe nia an ngaih thute an tarlang.
Source: Vanglaini
0 comments:
Post a Comment