Aizawl, July 8, 2014: A mawh lo e, a zaithiamzia hretute kan ni. Pensy B. Lalthangliani chu BingoṬhazual chart-ah hian Pensy-i hi kumin chhungin lan loh a la nei mang lo. Kum tir aṭangin a hla, 'I hnen ka lo kir e' tih hmangin a lang char char a, March 17 thleng khan he hla hmang hian a hming a chher. Ṭhazual aṭangin a liam a, mahse rei erawh a ni lo, May thla aṭang khan tuna pakhatna a nihpui hla 'Nitin hmangaih che ka duh' hmangin a rawn lang leh ṭan a ni.
Pensy-i hi 'Nitinin hmangaih che ka duh' tih hla hmangin May 12 khan pasarihnaah bul a rawn ṭan a, bul ṭanna ṭha tak a ni. A hla thu a ṭha a, a satu a thiam bawk a, hma a sawn chak hle. May 26 kha chuan palinaah a rawn kai phak tawh a, June thla chhung khan pahnihnaah a awm ngar ngar a, July thla a nih meuh chuan pakhatna a rawn hauh thei ta a ni.
'Nitin hmangaih che ka duh' tih hla hi C. Lalzarmawia phuah a ni a, hla châng tinah hian mihring nun hrang zel kan hmu a, chu nun aṭanga Pathian hmangaihna chungchang a ni. châng khatnaah hian Doctor la thar ang reng tak pakhat hian theihtawpin damlo a enkawl a, mahse a damlo enkawl chu a thi hlauh mai a, damlo chhungte chuan doctor chu an dem hle a. Doctor chuan chutiang hun harsaah pawh chuan Pathian a nei a, hrehawm ti hle mah se, Pathianah a innghat tlat a ni. Châng hnihnaah nula leh tlangval inngaizawng chanchin kan hmu a. A hmaa sual ṭhin, Pathian leh kohhranho ngaihsak ngai lo kha a pianthar hnuah chuan Pathianah a innghat a, Pathian avanga thlêmna leh harsatna a kalsan thu a ni a. Châng thumnaah rawngbawltu, sawichhiatna leh elrelna kara rinawm taka Pathian rawngbawl a, Pathiana a rinna nghat tlat chanchin a lang bawk.
The Chosen vocalist pakhat zawk, Mawitei chu pakhatna aṭangin pahnihnaah a chhuk thla. Mawitei hla, 'Ka thlang ber che' tih hi kumina Gospel hla ho zingah chuan a ṭha ber pawl a ni a, Bingo Ṭhazual Faknaah hian ṭum riat lai a lang. March 17 khan 10-naah bul a rawn ṭan a, March 31 kha chuan pasarihnaah a awm tawh. April thla chhungin palinaah a ṭhu a, May thla a thlen meuh chuan pahnihna a luah thei tawh a ni. May 26 aṭang khan pakhatna a hauh a, a zawna pakhatna ṭum thum a hauh hnuah pahnihnaah a chhuk thla leh ta a ni.
Idol Grace-i chu palinaaṭangin pathumnaah a rawn kâng a, a hmaa pathumna TBC-a palinaah a chhuk thla thung. Chris MS Dawngkima paruknaah a tla thla a, a hmun ruak, panganaah Lalremsiami (Nunui) a rawn awm thar. Baby Malsawmtluangi top 10 aṭangin a liam a, a aiah Jennifer-i kan hmu.
Bingo Ṭhazual Fakna
1. Pensy - Nitinin hmangaih che ka duh
2. Mawitei - Ka thlang ber zel ang che
3. Grace Lalchhanhimi - Ka thinlung chelhtu
4. TBC Zaithanpuia - Isu ka hmangaih che
5. Lalremsiami (Nunui) - Ka rinchhan Lalpa
6. Chris MS Dawngkima - Kawng min hawn ru
7. One in Christ - Ka zinna ram
8. Fiona Pachuau - A hnen rawn pan la
9. Becktei Sailo - Hringnun piah pialral ram
10. Jennifer Renthlei - Ka hmangaih Isu
Source: Vanglaini
0 comments:
Post a Comment