Aizawl, July 11,2014: Chief Minister Lal Thanhawla chuan, "Kohhran pawisawi kan tum lo a, kan khing lo. Min ṭanpuina
Nimina Assembly House-a MLPC Bill sawihona khar dawnah thusawiin Chief Minister chuan, "He bill kan pu lut hi kohhran thuawih lo kan ni lo a, sorkar anga kan tih tur, ram leh hnam tana ṭha tura kan ngaih a ni a, huaisen takin kan kal mai a ni," a ti.
Chief Minister chuan, "He bill-in a tum chu zu zawrh a ni lo. Zu in lo thei lo, a ruka in ngai, zu chhia in ngai, hengte hi eng angin nge kan chhan theih ang tih kan ngaihtuah. He bill-in a kawh chu kohhran mi, ram leilung fa an ni," a ti.
Bill an put luh chhan sawiin MPCC president ni bawk chuan, "Ram leh hnam tana ṭha tur anga kan ngaih a ni a, huaisen takin kan kal mai a ni. Huaisen takin kan enchhin dawn," a ti a, a fuh loh chuan sût leh theih a nih thu a sawi lang tel.
Mizo mipui chu zu rui ngai thei lo hnam ni se a duh thu a sawi a, zu rui khin thiang lo anga ngaihna chu tihbo a hun tawh thu a sawi lang.
Chief Minister chuan MLTP Act hlih chungchangah, "Pathian pawisawi hi kan hlau em em a, Pathian pawisawi loh nan ṭawngṭai pawh kan ṭawngṭai ve a, chuvangin kan tum ber zawka chu Bill hi Act a lo nih hnuah kan ram leh hnam hian khawvel hnam changkang kalphung zir chho se tih hi a ni. Zu buaipui em em hnam nih hi a zahthlak a, buaipui lo ber hnam kan nih theihna turin he bill hi a ṭangkaiin ka ring," tiin a sawi.
Kohhranin MLTP Act hlih duh loa ṭawngṭai an rawt chungchang sawi langin Hawla chuan, "Ṭawngṭai rualte pawh hi a ṭha, lungrual tak loa ṭawngṭai rual hi a sawt vak lo, kan dil a inan a ngai," a ti a; Congress sorkar chu 1997-a MLTP Act an hman hnu, 1998 inthlanah an tlak nghal thu a sawi lang bawk a ni.
Chief Minister chuan politics-a hlawkna lam ûm loin ram leh hnam ṭhatna tur zawk thlirin huaisen takin an kal tih a sawi a; enchhin a nih hnua a ṭha lo a nih chuan tihdanglam theih a nih thu a sawi.
Source: vanglaini
0 comments:
Post a Comment